مى ومصا يبها بقلم مروة حمدى

مى ومصا يبها بقلم مروة حمدى
وايه هى الراحة غير بيت وقت العصريه رايق وهادئ الأب نايم بيرتاح من تعب النهار بعد ما اتغدا وسط أولاده ال سلموا عليه وراحوا على درسهم بسرعه والأم فى المطبخ بتروق مملكتها و بتدلع نفسها بكوباية شاى بعود نعناع أخضر وتستجم شويه فى الهدوء ال حواليها تفصل حبه زى صاحبتنا مى ما هى نايمه كده على سريرها والكوباية فى ايدها وسانده ظهرها لوراء ربنا يهديكى يا مى وتفضلي كده على طول عاقلة.
لحظه ثوانى هى مالها بتبص كده على جوزها وهو نايم مش معقول هتتعرف على ملامحه بعد ١٢ سنه جواز لا البصه دى انا عارفاها كويس استر يارب وما يكونش ال فى بالى.

اخ دى بتتسحب بتليفونه وخرجت بره الأوضة وبعدين يامى ياترى ناوية على ايه
مى فى الصالة وماسكه التليفون فرصة على نايم لما ادخل اشيك على التليفون والف لفه فيه على السريع كده!
_بس كده غلط يا مى.
مى بسم الله مين مين ال بيتكلم
_بقا مش عارفانى وانا ال شاهده على بلاويكى.
_بس انا مبعملش بلاوي.
_ازاى بقا وال فى ايدك ده ايه
_ده تليفون جوزى.
_وبيعمل فى ايدك ايه
_ابدا هشيك عليه فيها حاجه دى!
_كده غلط يامى..
_لا مش غلط اومال هعرف اذا كان بيخونى ازاى!
_وقتها رينا هيفضحه قدامك من غير ما تلفى وتدورى وبعدين المفروض يكون عندك ثقة فى نفسك وفى جوزك اكتر من كده.
_انا واثقة فيه بس مش فى ال حواليه ممكن وحده كده ولا كده توقعه فاكشف الموضوع من أوله احسن.
_هنصحك نصيحه واسمعيها منى بعمايلك دى جوزك حتى لو مش بيعمل حاجه غلط هيعمل اصل خلاص عرف ديتك وغير كده هيقول عملت زى ما عملتش فمفرقتش.
_لا على مش هيعمل كده.
_طب يبقى لازمته ايه نمسك حاجته ونعمل مشاكل!
_لا ده بصه فى السريع اشيك عليه هطمئن وارجعه مكانه من غير اى مشكلة بعيد الشړ..
_انتى فاكرة اخر مرة من شهرين لما شيكت عليه حصل ايه
_ها لا مش فاكرة.
_افكرك انا ما انا بقولك شاهدة على بلاويكى.
يومها كان على راجع من الشغل تعبان اتغدا ونام على طول والتليفون جاتله رسالة..
وقتها انتى مسكتيه وقرتيها ومن غير ما تركزي روحتى زى القضاء تصحيه من النوم تقوليله..
مى قوم يا بيه قوم شوف السنيورة ليلى ال مش قادرة تنساك ومسهراها الاشواق.
الراجل صحى مخضوض من نومه ولما خد التليفون وجمع ال تقصديه فهمك بطلوع الروح أنها قاصده اخوه وواخداه واسطه علشان مراته ما تعرفش وتعملها مشكلة.
ال انتى اتسببتى فيها بعد كده تانى يوم..
مى اللاه ما هى ال بعتت تأنى بعد ما كلمها قدامى وقالها انسى الموضوع ده وشليه من دماغك بت لاصقة!
طب وال حصل بعدها باسبوعين افتكرتى..
مى لا مش فاكرة.
_انا عارفة فقدان الذاكرة ال بيجيلك ده لما تكونى غلطانه