كبرياء أمرأة
اتجوزت اللي بحبها وكانت نعم الزوجة ف كل حاجة حياتنا كانت مثالية جدا اتأخرت الخلفة ولما كشفنا اټصدمنا بحقيقة اننا مستحيل نخلف من بعض.. زي الافلام العربي هي تخلف من غيري وانا اجيب طفل من غيرها بس من بعض مستحيل .. كانت صدمة كبيرة جدا بس هي رضيت بقضاء ربنا وقالت اني بالنسبالها اهم من 100 طفل وانا كمان كنت رضيت بالامر الواقع بس انا رغبة الخلفة عندي كبيرة جدا من زمان وللأسف بعد فترة فكرت بانانية واتجوزت من وراها عارف انكو هتعبروني شخص واطي وانا معترف بكده انا كنت عاوز كل حاجة عاوز اللي بحبها وعاوز الطفل عارف ان هي كمان حقها بس هي عشان تقدر تخلف كانت لازم هتنفصل عني وتتجوز غيري بس انا اقدر اتجوز وهي موجودة ف حياتي اه تفكير اناني وسىىخ معترف بكده بس مين فينا مش عاوز كل حاجة !! مقدرتش اقولها لانها اكيد كانت هتطلق بحجة ان هي كمان عاوزة تخلف وللأسف حقها مكنتش هقدر اقول كلمة وحدة عشان كده مقولتلهاش وجبت الطفل وللأسف عرفت وهي حاجة صعب تستخبي لوقت طويل ف الأول اتعصبت وبكت وحالتها النفسية اټدمرت وكنت مستني منها اللحظة اللي هتقول فيها طلقني ومش عارف ازاي هقنعها بغير كده بس اتفاجئت انها بعد ماهديت مطلبتش الطلاق وقالتلي عاوزة اربي الطفل مع امه وقتها الفرحة مكنتش سايعاني حرفيا حضنتها وجريت اجبلها الطفل بس امه وقفت فيها بسبب غيره ستات وانا مش هديها ابني دي عاوزة ټنتقم مني ومش عارف اي عملت معاها خناقة كبيرة وهي راحت بيت اهلها مع الطفل وعاوزة تطلق ومراتي الأولي لما سمعت كده قالت خلاص مش مشكلة لو دي حاجة هتخرب بينكو انسي اني طلبت منك حاجة وعادي مش زعلانه.. كسرتها وهي بتتكلم بتخليني مش قادر حتي ابص ف عينيها وانا عارف اني سبب حالتها دي من وقتها مضحكتش ضحكة وحدة بتتعامل معايا ف منتهي البرود كانت مبتبطلش ضحك ولعب ورخامة روحها اتطفت بقت تطلع الكلمة بالعافية مش عارف ارجعها زي الأول قولتلها تعالي نسافر كام يوم شرم قالتلي وناخد مراتك التانية معانا قولتلها لا انا وانتي بس قالت مينفعش ولازم تعدل ومش عارف اي لما بقعد عندها يوم زيادة بتقولي انت النهارده يومك عندها مش عندي كأنها بتستني اليوم اللي امشي فيه حتي ف علاقتنا بقت بالنسبالها تقضية واجب ومش فاهم هي اي جابرها ع وجودها معايا طالما مش طايقاني كده ولا عارف ازاي ارجعها زي الأول !!
