بنتي اتغيرت

السلام عليكم ورحمة الله وبركاته 
بنتي عندها 31 و مخطوبة لواحد عنده 41 كويس ومحترم وذوق جدا معانا هو بيشتغل محاسب في شركة خاصه مسبقش له الجواز وسبب تأخيره في الجواز عشان هو اكبر اخواته وله بنتين اخواته كان بيجهزهم وواحده منهم اتجوزت والتانيه هتتحوز قريب خلاص ولما اطمن عليهم بدء يشوف نفسه ومستقبله 
 بنتي وافقت عليه ورحبت وكانت فرحانه اوي بي لاننا معارفنا محدوده فمفيش حد كان بيتقدم لها لانها كمان كانت قاعده مش بتشتغل بس بعد ما اتخطبت طلبت منه انها تدور على شغل وتنزل تشتغل عشان جهازها وهو رحب وكان بيدورلها على شغل وبيبعتلها وهي كانت بتقدم لحد ما اتقبلت في شغل كويس ومرتبه كويس بس المشكله انها 

دلوقتي مبقتش قبلاه نهائي و شايفة أن سنه كبير عليها و كتير عشر سنين فرق السن ونفسيتها تعبانه وكل شوية تقولي ياماما تفكيرنا مختلف وانا مش عاوزاه لأن لما هي نزلت شغل و الدايرة بتاعتها كبرت وشافت ناس جديده وشافت اللي قدها واخدين عرسان مناسبين هي 

دلوقتي اتعرفت ع واحد عنده 35 معاها في الشغل يعتبر المدير بتاع القسم اللي هي فيه مطلق مراته من ٣ سنين ومعاه بنت وولد مع مامتهم ومستواه المادي ماشاء الله عالي جدا 
 وسألها سنك كام و مخطوبة ولا لا قالتله لا ( هي ع طول قالعة الدبلة )  ف هو دلوقتي عايز يتقدملها هل حرام لو سابت خطيبها دة و اتخطبت للشاب دة هي اعجبت بيه و سنه قريب ليها فاكيد هيبقى فيه توافق بينهم في كل حاجه 
ياريت تقولولي نصيحه ولو سابت خطيبها اللي معاها هيبقى فيه ظلم ولا حاجه له ولا كويس انها هتعمل كده دلوقتي احسن ما  كانت اتجوزت وبعدين تطلق  وتاخد لقب مطلقه لأن ده تفكيري كأمها وعاوزه اشوف بنتي احسن واحده في الدنيا وفرحانه وسعيده باللي معاها