خاېف من زعل امي
السلام عليكم ورحمة الله وبركاته
بقالى فتره متغرب
مراتى تعبت نفسيا من سفرى
وطلبت الطلاق اذا استمريت فى سفرى
هديتها واقترحت انها تيجى زياره وتعمل عمره بس تدينى وقت اظبط امورى
لانها عارفه ان كل فلوسنا اشترينا بيها شقه مستقله لينا بعد ما كنا عايشين فى بيت عيله
مراتى تقبلت الامر
وحاليا صديقى فى الشغل كان متاجر شقه واهله جم حجوا فيها ومراته رجعت مع اهله
فاقترح عليا يلم حاجته وييجى يقعد مكانى فى السكن ويسبلى الشقه مدة الزيارة
والحمد لله ظبطنا الامور
قامت امى زعلت وقالت هتاخد مراتك ومش هتاخد امك وابوك
لكن مراتى وزمايلى قالولى خليها على الله
وأصحابي دخلونى جمعيه وادوهانى الاول الجمعيه بعشرة الاف ريال وهدفع الف كل شهر وجزء منها هيكون عشان زيارة مراتي وعشان العمره بتاعتها
بعدها الكلام اتغير لما امي عرفت موضوع الجمعيه من مراتي
وامى بتقولى الفلوس اللى كنت هتطلعنى بيها انا وابوك عمره ساعد اخوك الصغير يتجوز
اخويه ٢٤ ولسه مخلص جيش
فبصراحه
رفضت
قامت امى حالفه يمين ماهى طالعه العمره ولا عايزه منى حاجه
طب
دلوقتى لو اخدت مراتى
هركب نفسى الغلط
ولو سيبتها ومخدتهاش
واخويه
مقدرش اديله الجمعيه اللي هفضل اسدها سنه
قلتلهم اساعده ب١٠ الاف او ٢٠ لما ينوى يتجوز
انما اديله اللى حيلتى ولسه هسدده لانهم عاوزني اديله ١٠٠ الف وده ميرضيش ربنا
الناس اللى اتدخلت تصلح
بيقولوا ادى اخوك
طالما كده كده المبلغ ده كان طالع من ذمتك ليهم
طب ده صح؟
انا كنت مطلع المبلغ بنيه صافيه فى سبيل اشوف ابويه وامى ومراتى واقعد معاهم
انما لو اديت اخويه المبلغ ده مساعده
انا مين هيساعدنى اسدد المبلغ ده
فبصراحه كده
هو انا على غلط فعلا؟ لاني خاېف من زعل امى وابويه ليكون (عقوق)
