مش من مستوايا

من غير تجريح انا زوجه تانيه فرق السن بيننا ١٨ سنه انا ٢٧ وهو ٤٥ ميسوره الحال وهو شغال ف مصنع والدي وهو محترم جدا وبيحبني جدااا وبيتقي الله فيا ومعايا مولود شهرين وحامل وطول منا ف بيته اللي ف محافظه غير محافظتي 
هو معايا ومش بيروح لو قعدت سنه لكن زوجته الأولي بتفتعل المشاكل بدون سبب المشاكل التافهه زي مثلا تعالي لقيت صرصار وحاجات شبه كده غريبه وهو ساعات يروح عندها وبالعافيه وساعات لا ويفضل يقعد عندي وسبب الزواج التاني المعامله السيئه وعدم العلاقه الشرعيه والتلاكيك علي كل شيء 
وهو مطلقهاش علشان بنته صغيره ١٠ سنين وهو متعلق بوجود البنت جداا .. انا بعشقه حرفيا وهو كمان انا مش عارفه اتحمل دوشتها 

لانها بتتعامل بطريقه وحشه جدا بمعنى الاصح هي شرشوحه اووي ومستواها البيئي والتعليمي صعب جدا وولاده كمان جعلتهم دون المستوي التعليمي دون المستوي الأخلاقي فيهم ولد بيسب الدين للاسف الشديد والمشكلة اني مكنتش اعرف ولا اتخيل ان زوجته الاولى بالمستوى المتدني ده والمشكله التانيه ان سعادتي معاه هي اني اشوفه مبسوط لكن مش عايزه اسمع عن مشاكلها وهو بيحكيلي لاني اقرب حد له لكن انا زهقت وهو سعيد جدا جدا معايا بشهادته هو وبيخاف علي زعلي وعليا وبيغير من الهوا انا عايزه اطلق لاني مكسوفه من وجودي ك زوجه مع شخص متزوج من واحده بالمستوى ده ومش حابه اخيره بيني وبينها وأحط نفسي ف مقارنه زي دي رأيكم اي ويا ريت باحترام لاني ف الآخر مش عامله حاجه حرام ولا عيب انا اتجوزت بفرح وعلم وهي عارفه من قبل ما نتخطب ووافقت