ده انت جبتها على الحديده

انا رجل في اخر الثلاثينات باشتغل في الخارج في شركة وعندي دخل كويس جدا .. انا مرتبط جدا بأهلي ..وخاصة والدتي ..وده لان اخويا الاكبر متجوز ووواخد مراته واولاده بره واهلي حاسين انه مراته عايزة تاخده ليها وبس ومن ٥سنين اتعرفت على بنت وحسيت انه فيها المواصفات اللي انا عايزها كزوجة رغم انها كانت اكبر مني بس ده مكنش فارق معايا واقنعتها انه عادى لانها كانت خاېفة جدااا ورافضة الفرق ده ..المهم خطبتها واتجوزنا وربنا اكرمنا بطفلين في الاول كانت الحياة ماشية عادى وبيحصل خلافات بينا بس بتعدي 
انا كنت حاطط حدود في التعامل يعني مكنتش بتختلط بحد غير في حدود العيلة ولما اكون موجود بس 

وطبعا اخدت اجازة من شغلها لانه ده كان اتفاقي معاها وطلباتها والدتي اللي كانت بتجيبلها لاني مش عايزاه تخرج وتتبهدل وهي مكنتش بتعترض ابداا عادى جداا تقعد بالشهور ما بتخرجش من البيت وخاصة ان اهلها في محافظة تانية بس انا كنت عايزها دايما تبقى مع اهلي وتندمج معاهم واولادي يرتبطوا بوالدتي واهلي وخاصة ان اختي قاعدة معانا في البيت وطبعا مكنتش معرفها حاجة عن شغلي ولا باقبض كام ولا فلوسي فين 
لاني كنت عامل توكيل لوالدتي بالمرتب والفلوس كلها معاها هي وكنت باعتبر إخواتي مسئولين مني رغم انهم ميسورين ماديا جداا ومراتي بردو عمرها ما اتناقشت معايا في كدا ولا سالتني اصلا ..حتى المشاوير العادية كنت باخرج من غير ما اعرفها رايح فين
اخر سنتين بدأ حالها يتغير وبقت تاخد جنب مني ومن اهلي وزي ما تكون عايزة تبقى لو حدها وده اللي اختي لاحظته كمان ووالدتي 
الحقيقة حسيت انى مخڼوق منها وحصلت بينا مشكلة لقيتني بكلم اخوها واقوله تعال خد اختك رغم انه مكنش عايز يجي ابدا وقالي حاول تحل مشاكلكم مع بعض علشان والده وقتها كان تعبان ومكنش عايز يدخل نفسه في مشاكلنا بس انا اصريت انه يجيي ياخدها وقبل ما تمشي اخدت منها دهبها كله حتى الدبله واي فلوس معاها واي ورق يخصني نزلته عند والدتي حتى اوراق الاولاد وشهادات ميلادهم واوراق شغلها 
وجهزت ورقي وسافرت وقعدت ٧ شهور وخلالهم والدها ټوفي وبعت لاخوها تعزية مردش عليا 
وخلال ال ٧ شهور دول والدتي حاولت تتواصل مع الولاد مرتين وفعلا كلمتهم وبعد كدا مفيش اتصال بينهم 
وانا تجاهلتها تماما ومكلمتهمش نهائيا 
ولما رجعت كنت جايب حاجات للولاد رفضوا ياخدوها وقالولي كنت فين من ٧ شهور مفكرتش تسمع صوت عيل من عيالك 
وفي الاخر لقيتها رافعة نفقة للولاد اخدت جوز اختي المحامي علشان يثبت انه مليش شغل هنا وملهمش عندي حاجة 
عارف انها هتقرا كلامي ..وعايزها تحس بالغلط اللي عملته كنت مستنيها تخلي الولد يكلمني لما يسال عني ..كنت مستنيها تحسسني انها باقيه بس طالما باعت فأنا بايع