انا عريس جديد

نزل لوسمحت
انا عريس جديد لسه مابقاليش اربع شهور جواز. انا بحبها ومرتاحلها جداااا وبحس بسعاده غريبه كل مابشوفها بس خلال الفتره اللي فاتت لاحظت مراتي كل مابتقول حاجه بتحصل ولما بحاول اخبي عليها حاجه بيحصل مصادفات غريبه تظهر اني كنت بحور او بخبي او بكدب
دماغي لفت فجربت اقرأ سورة البقره كل يوم لفتره ماحصلش اي حاجه ولا حتى ظهر عليها اي حاجه تقول انها متدايقه او مش حابه القرآن

ساعات بحسها بارده وخاليه من المشاعر رغم انها رومنسيه وحنينه ومهتمه بيا بس هي بتقول ده اسمه هدوء رباني وثبات انفعالي مش برود

هي الحقيقه طيبه جداااا ومتسامحه وحقانيه وعارفه ربنا بس حكاية انها بتعرف حاجات مش عايز اقولها او احكيها دي قلقاني حتى لو اظهرت انها مش واخده بالها بس بفهم بعد كده انها عرفت وفهمت وطنشت وكذا مره قالتلي اني مش محتاج الكدب في حاجه في حياتي لانه حرام ولان دايما الكدب 

بيهدي للفجور وعمر ماهييجي من وراه خير ابدا مهما كان السبب برده ..
غير كده كل مابندخل نقاش او جدل بلاقي الجدل قلب لصالحها ومابعرفش اغلطها او اقلب الكلام عليها رغم ان مع غيرها بعرف ألف الكلام كويس وماحدش بياخد مني لاحق ولا باطل

امبارح كانت معايا نزلت من العربيه ووقفت على جنب لحد ما أركن العربيه وحرامي حاول يشد شنطتها ويجري مجرد ماقربلها اتكعبل حوالي اربع مرات ورا بعض واتكفى على وشه كل مايقوم عشان يجري يقع تاني لحد ماهيبته بقت فالارض حتى ماحصلش حرامي مشابك
هي شكلها عادي وتدينها كمان عادي ويمكن اقل من العادي بس عموما هاديه وكلامها قليل بس انا مش فاهم هل انا كده مكبر الموضوع ولا اټجننت وكل دي تهيؤات واوهام👀