حياتي اتغيرت بعد زواج زوجي

مشكله عضوه 
الردود باحترام وعدم التجاوز فى الرد 
انا متجوزة وعندى اولاد وكانت الدنيا ماشية كويس جدا ومفيش بينى وبين جوزى مشاكل اول ٨ سنين لحد ما اكتشفت انه متجوز ومراته حامل كمان طبعا اټصدمت وانهرت وكنت بروح لدكاترة نفسيين وحصل طبعا مشاكل كتيير بينى وبين جوزى بسبب كدة كان فى الاول متمسك بيا ومش عايز يطلقنى وبيحاول يرضينى وانا مكنتش قادرة اطلق وابعد عنه وفى نفس الوقت مش قادرة اتعامل معاه واحس معاه بالامان بس كنت بحاول اصلح وبعديها عرفت انى حامل فى ابنى الثالث هنا اخدت القرار انى هكمل واعيش واحاول انبسط وركزت فى حياتى واولادى وجوزى وفصلت دماغى ان فى واحدة تانية فى حياته لحد ما مراته الثانية لاقيتنا مستقرين والدنيا هديت ابتدت تعمل مشاكل وشغل غيرة والايام اللى فيها عندى تتصل تتخانق معاه وتعمل مشاكل علشان يقعد مضايق معايا وينكد علينا فضلت ساكتة وصابرة عدت ٣ سنين هى طلبت الطلاق واطلقوا وانا فى حالى وحتى مش بسألوا عن اى تفاصيل تخصها

هو كانت حالته المادية حلوة جدا بعد ما طلقها ظروفه المادية بقيت من سئ ل أسوء وبقى عليه ديون كتيير اوى ده غير اتغير معايا خالص ومبقاش طايقنى وبيتلكك على المشاكل وعايز يطلقنى كمان من غير اسباب واضحة لحد ما سابلى البيت وقعد اكتر من سنة سايبنى من غير طلاق ولا جواز واتكلمت معاه كتيير علشان يرجع البيت ونصلح الدنيا رافض تماما وبيكلمني بعدوانية كأنى معرفوش وبيتكلم عنى اوحش كلام وبيكذب فى كل ده
بعد ما عدت سنة لاقيته بعتلى عايز يقعد فى البيت مدة قصيرة لحد ما يبقى معاه فلوس ويأجر بيت انا وافقت رجع البيت ومبيتكلمش معايا غير فى اضيق الحدود وبينام لوحده فى اوضة وانا مش قادرة ابدأ بالصلح بعد اللى عمله فيا بس لو رضانى انا هسامحه بس انا موجوعة منه اوى عدت المدة اللى كان محددها لقعده فى البيت ولسه قاعد بقاله شهور وقدام الأولاد شايفنا مبنكلمش بعض ولسه بيتعامل اوحش معاملة
معايا اتكلمت معاه كتير ان لو مش عايز صلح يطلقنى بيقولى مش دلوقتي وانا تعبت من العيشة كدة ل منى متجوزة ولا منى متطلقة وفى نفس الوقت بخدمه بعمله اكل وبغسله هدومه وبنظف اوضته ده غير انه واخد اوضة اولادى وهما محتاجينها مع العلم معندوش حد كبير اشتكيله ولا اب ولا ام حتى اخواته منعهم يكلمونى
وهو بعد ما كان حالته المادية كويسة جدا بقى عليه ديون كتيير ومكتئب بسببها
مش عارفة اللى بيعمله ده بسبب شغله اللى وقع والديون اللى عليه ولا ايه مش فاهمة
فيدونى بالله عليكم وياريت تدعولى بظاهر الغيب ان ربنا يهديه