فانوس محمود سعد

امبارح كنت بشوف فيديو لمحمود سعد، فاللي بتسأله اديتله الفانوس دا وقالتله له لو دا فانوس سحري، وتقدر تطلب منه يرجع لك حد..  تحب يرجع لك مين؟ . قالها يرجع لي امي...

فاول كومنت لفت نظري، هو "لو سمحت حضرتك ايه الي عملته الست الوالدة رحمها الله عشان تبقى لها بارا محبا متذكرا.؟.. اريد ان ازرع نفس الشعور في اولادي"..

وانا قلت لكم هبقى احكيلكم قصة السيدة الفاضلة ام محمود سعد.. فدي فرصة كويسة نحكيها..

ام الاستاذ محمود سعد، اسمها كوثر، صحفية في روز اليوسف، واتجوزت ابوه، وخلفت منه 4 عيال، وبعدها اختفى الاب، اختفى بمعنى مبقاش ليه وجود في حياتهم، الام بقت هي الام والاب، بيقول محمود سعد: "امي رفضت الطلاق من والدي وهي عندها 27 سنة، من وهي 27 سنة بتلعب دور الام والاب وكل حاجة.. ولما سالتها ليه متطلقتيش؟.. قالت علشان كنت عايزاه ييجي يزوركم ولما يجي البيت ويبات يبقى جوزي مش طليقي.. مكنتش عايزة اديله سبب يبعد عنكم.. لكنه كان بيبعد..

محمود سعد وهو راجل في السبعين من عمره، طلع في لايف من قريب، وقال إنه مش بيحب ابوه لانه مش فاكرله اي حاجة، غير مشهد مرة، دخل لقاه رافع سكيـــ.نة المطبخ على أمه...

بيحكي محمود سعد إنه لما ابوه ماټ، محسش بأي تأثر، لانه فعلا مكانش ليه اي دور، هو مشافهوش غير مرات تتعد ع الايد، هو كان راجل ميسور وسايب عياله في فقر، وكان بيتجوز كتير، ويخلف كتير، وقال : " أنا حتى مش فاكر هو ماټ امتى، أنا أبويا كان خالع نفسه من حياتنا رغم أنه كان غني، ورغم إن تربية أمي نجحت ومطلعتش مچرم ولا صايع، لكن لغاية دلوقتي لما اسمع حد بيتكلم عن أبوه بتضايق، ولما كبرت بقيت أقول أبويا قالي إيه أو إيه الذكرى اللي سابهالي ملقتش حاجة".