جوز بنتي

السلام عليكم ورحمه الله وبركاته 
كنت عايزه اخذ رايكم في موقف حصل لي مع خطيب بنتي
 انا ام لثلاث بنات ما عنديش صبيان... اتقدم لبنتي واحد جارنا يفرق عننا اربع خمس شوارع وطلب انها تعيش في بيت العيله قلت له والمطلوب في بيت العيله ايه ؟...قال المطلوب واحد اثنين ثلاثه اربعه عشان ما اطولش عليكم الحاجات اللي كلكم عارفينها  
 وامى هتعاملها زي بنتها بالظبط قلت له انا ما عنديش مانع لكن برده انت عارف انا ما عنديش صبيان وكان نفسي ربنا يرزقني بولد وكده ربنا رزقني بيك انت ابني وتتعامل معايا برده زى والدتك وهعاملك كواحد من العيله فانت زي ما انت طالب من بنتي انها تعيش في بيت عيله وتتعامل مع والدتك كانها امها انا برده هاتعامل معاك كانك ابني بمعنى ....الصبح وانت رايح الشغل تيجي تعدي عليا بالعربيه تودينى شغلى وانت راجع تعدي برده عليا ترجعني البيت

 لما اكون راحه اجيب تسويق بتاعه اول كل اسبوع تيجي معايا تشيل معايا الحاجه وتطلعها لي البيت
الانبوبه لو خلصت برده واحتاجتك تطلعها لي ما فيش مشاكل 
راحه مشوار كده ولا كده ومحتاجك توصلني عادي طبعا ده غير مثلا لو حصل لا قدر الله مشوار طارئ كده او كده ..رايحين فرح.. رايحين نجيب حاجه انت ابني وهحتاجك معايا تبقى ايدك بايدي 
 لقيته اتخض وبص لي شزرا و بيقول لي هو انا كده هبقى مقطوع لكم وانا ورايا برضو مصالحي ورايا التزاماتي وعايز اخذ راحتى وحريتي وانت ازاي تحكمي عليا بحاجه زي كده قلت له انت زى ما انت عايز تحكم على بنتي بانها تخدم والدتك انها تعاملها زى امها.. انت برضو لازم تتعامل معايا ان انا امك واللى اطلبه منك تنفذه 
 قال لي لا خليها قاعده جنبك
قلت له خليها بكرامتها وبتقعد في بيت اهلها معززه مكرمه ما حدش له حاجه عندها 
انا كده غلطت ؟؟؟ الناس اللى بتقول طب انا مرفضتش من الاول ليه و خلاص و ايه اللى مخلينى اسالكم انا صح ولا لا 
العريس كان زميل بنتى و قصة حب سنتين و هى كانت متمسكة بيه جدااااا فقلت لها هتشوفى انه مش شاريكى بمجرد ما اقوله الكلمتين دول 
وبسالكم عن تصرفى لانها زعلانة منى و بتغلطنى ع اللى عملته و بتقولى طفشتيه
معلش لو طولت عليكم