جوزي متعمد يخسرني
سلام عليكم
انا متزوجة من 3 سنين وربنا رزقنى ببنت وولد وقبلها كنت مخطوبة لواحد تانى ومحصلش نصيب زوجى للأمانة خلوق وطيب وحنين وصفات كتير مش موجودة فى ناس كتير دلوقتى بس عنده عيب واحد بيضيع بيه جمال صفاته ده قبل ما نتزوج كان مكتوب كتابنا سنة مش هقول حصل بينا تجاوز والكلام ده لأن كل اللى حصل انه بقى بيمسك ايدى أو يحطها على كتفى واحنا ماشيين وسورى يعنى ممكن يبوسنى والله ما حصل اكتر من كده وهو فى الوقت ده زوجى واتممنا زواجنا الحمدلله وكل اللى حوالينا بجد كانوا بيحسدونا على بعض وربنا كرمنا بأولادى ومن وقت زواجنا وانا معاه على ظروف والدته كانت مريضة سړطان ومن بعد زواجى بشهرين وهى مقيمة فى بيتى وكنت برعاها إلى أن توفت من 7 شهور ومن وقتها أخته وأخوه ووالده معانا فى البيت انا اللى مسئولة عنهم رغم أن أخته مش صغيرة سنها 24 سنة وانا اللى شايلة البيت والولاد وأهله وشغلى كمان ومرتبى كله في البيت وهو بيعاملنى كويس بس لو حصل اى مشكلة يقولى انا المفروض ماكنتش أكمل معاكى بعد ما سمحتيلى ابوسك واكيد طبعا زى ما سمحتيلى كان خطيبك الاولانى برضه بيعمل كده وبعدها يعتذرلى انه المفروض مكانش قال كده
من يومين حصل بينا مشكلة تافهة جدا قالى نفس الكلام وقال انتى كده ژانية لأن مكنتيش لسة دخلتى بيتى
الكلمة صدمتنى قولتله لا انت مش طبيعى وانا مش هقدر أكمل معاك وهقول لأهلى ولأول مرة احكى مشكلة زى كده لأهلى طبعا اضايقوا جدا وانا قولتلهم انى عاوزة أطلق وهما قالوله طالما شايفها كده كملت معاها ليه وخلفتوا اتنين مالهومش ذنب انهم يطلعوا يلاقوا ابوهم بيقول لامهم كده برغم أمها مستحملة كل الظروف اللى هى عايشة فيها ومستحملة وجود ناس فى بيتها من ساعة ما اتجوزت ومش عارفة تاخد راحتها فى بيتها خلاص شيل ده من ده وهو أعتذر كتير وقال مش هقول كده تانى بس انا عارفة أن ده هيحصل تانى وتالت ومع كل مشكلة
وانا صعبان عليا نفسى بعد كل اللى بعمله برضه مع كل مشكلة مالهاش لازمة يقولى كده ويحسسنى انى عملت چريمة وذنب كبير ويجرحنى بكلامه ومش قادرة استحمل ان ولادى تكبر ويلاقوا بيقولى ژانية زى ما قال ومش عارفة اعمل ايه اصمم زى ما انا على الطلاق ولا أعمل ايه
آسفة انى طولت عليكم وأسفة أن كلامى مش مرتب بس انا مش عارفة أوصل اوى
