اجري ولا افضل قاعد

امي داخله جمعيه مع واحده جارتنا وكل يوم تكلمها ف التليفون تقولها عملتي ايه ف الموضوع ال قولتلك عليه وانا مش فاهم موضوع ايه بالظبط ، لحد ماعرفت من كلام امي مع الست انها بتدورلي ع عروسه ، امبارح الست جات عندنا وقالتلها انا لقيت ل ابنك بنت زي القمر ربنا يجعلها من حظه ومن نصيبه امي قالتلها طب هنروح نشوفها امتا ، قالتلها انا كلمت امها وقالتلي هتتفق مع جوزها وبعدين يحدده معاد ، امي قالتلها ماشي النهارده الست اتصلت بأمي قالتلها الناس جاهزين لو انتي فاضيه هاتي ابنك وتعالي 

 روحت انا وامي اتفاجات اني البت زي القمر فعلا مفهاش اي غلطه ، امي اول مابصتلها قالتلي يلا نقوم نمشي راح ابو العروسه قالها فيه اي ياحجه بنتي مش عجباكي ولا ايه ؟ امي قالتله مش عجباني دا انا لولا الحرومنيه ل كنت طلبت ايدها منك لنفسي ، انا كنت جايه ع اساس تبقا واحده قريبه من الشكل ل ابني إنما دي مش هتنفع معاه ابدا انت شايف ابني عامل ازاي وبنتك عامله ازاي حرام نظلمها الراجل ضحك وقالها عمرها ماكانت بالشكل ابدا ياحجه اهم حاجه الأخلاق والروح الحلوه وبعدين احنا هنروح بعيد ليه منتي شايفه البت 

طالعلي ف الحلاوه وامها مناخيرها قد مناخير ابنك ازاي لقينا كوبايه لبست ف دماغ الراجل وقع ف الارض امي من الخضه طلعت تجري وسابتني فوق عند الناس