ابني الكبير
السلام عليكم ورحمة الله وبركاته
انا اترملت وبنتى وابنى كانوا لسه صغيرين وكان لازم اكون شديده معاهم علشان الاب مش موجود
لما ابنى كبر شويه وابتدا يعرف بنات كنت ببهدله ومره في الجامعه عرفت انه نزل يقابل بنت وروحت وراه والموقف كبر لدرجة انى ضړبته بالقلم قدامها وشتمته وشټمتها
الحمد لله ولادى طلعوا محترمين وكانوا ناجحين فى دراستهم والحمد لله ناجحين فى شغلهم وده بفضل ربنا اللى ساعدنى اكون لهم الأم والأب لكن انا عارفه ان ابنى بيكرهنى من ساعة الموقف اللى حصل لما ضړبته قدام الناس برغم ان الموقف فات عليه سنين كتير لكن معاملته معايا رسمى قوى. لما اتخرج واشتغل مشى من البيت وراح أجر شقه بحجة ان شغله بعيد برغم انه اشترى بيت بعد كده ابعد من بيتى لشغله ومش بشوفه الا قليل
من كام يوم كنت تعبانه وكلمته علشان اروح للدكتور جه اخدنى بعربيته لكن طول الطريق متكلمش معايا ولا كلمه ولما رجعنا وصلنى للبيت ومرضيش يطلع بحجة ان الوقت اتأخر وعايز يروح ينام علشان شغله
عنده 35 سنه ولا خطب ولا فكر يخطب برغم ان بيته ما شاء الله وعنده عربيه حاسه ان الموقف خلاه متعقد من الجواز لان اكتر من واحده من قرايبى كلمونى لو نرتب قعده بيننا وبينهم بحيث تكون بنتهم موجوده ويشوفوا بعض ويتكلموا مع بعض ولما قلت له صدنى وقالى مش فايق للجواز والكلام الفاضى
مش عارفه هل انا غلطت انى كنت شديده عليه يعنى أي أم مكاني كان المفروض تعمل ايه ساعتها وتعمل ايه دلوقت لانه واحشنى قوى
