زميل جوزي

هعرض عليكم مشكلتي ولو أنا غلطانة قولوا بس بالأدب بالله عليكم
انا من زمان متعودة احضر لانش بوكس لجوزي لأنه مبيحبش يفطر الصبح بدري ف بعمله ويفطر بيه فالشغل. 
زميل جوزي فالشغل راجل معندوش ذوق وطفس.. جوزي قايلي ازود ف محتوي اللانش بوكس عشان زميله ده بيفطر معاه رغم ان زميله ده مبسوط ماديا بس ولا يوم جاب معاه فطار فالشغل ولا حتي عزم عليه بكوبايه شاي .. جوزي من النوع اللي مش بيحب يحرج حد وانا مضايقاني اوي حوار انه زميله اتعود والفضل يرجع لجوزي طبعا لأنه هو من البداية اللي عوده ع كده .. وانا بصراحة شايفة انه كده حرام وغلط والأولى بالأكل والشرب ده انا وولادي لأنه هو مرتاح ماديا وعنده زوجه قادرة تعمله اكل. وجوزي بنفسه اشتكالي منه كذا مرة انه معندوش ذوق وطفس بس جوزي مش قادر يقوله وكمان زميله ده قاله كذا مرة خلي مراتك تنوع وتفنن ف الاكل يعني بدال ما بعمل سندوتشات جبنة ولانشون خليها تعمل بانية او بوفتيك وكده يعني وانا بصراحة متغاظة منه ومن بروده وقله ادبه. 

من يومين وانا بحضر اللانش بوكس لجوزي عملت حساب جوزي ف الاكل بس وقفلت اللانش وحطتهوله ف شنطته. 
ف لما راح الشغل وجه يفطر هو وزميله.. جوزي اتفاجئ ان الاكل معمول لشخص واحد مش لشخصين. المهم انه لما رجع البيت قالي اللانش بوكس مكنش فيه غير اكل لشخص واحد ف بقوله ايوة ده صحيح وانا عملت كده عشان زميلك ده يحس ع دمه ويفهم ان كفاية طفاسة وتعود قام جوزي ضاربني بالقلم وبعدين ضړبني ع ضهري وبقي يضرب فيا بالاقلام ع وشي لحد ما سنتي اللي قدام اتكسرت بالنص.. بعد الخناقة بساعة قعد يتأسف وعيط والله عشان اسامحه.. قالي انتي حطتيني ف موقف محرج قدام زميلي بس انا مرضتش اسامحه ولا اكلمه وخدت عيالي وروحت ع بيت بابا. 
جوزي سلبي اوي وضعيف مع الناس برة.. وزميله ده لا بيفهم بالذوق ولا بالعافية جوزي عوده ع كده وانا اتخنقت منهم هما الاتنين.. والله لو كان حد تاني غير زميله ده انا مكنتش هستخسر فيه الاكل لكن ده بالذات خسارة فيه لأنه ع طول يقول لجوزي مراتك بخيله ومش بتعرف تحضرلك اكل حلو. وكمان طفس اوي يعني ممكن يوصل بيه انه ياكل الاكل الباقي اللي جوزي بيسيبه وبيقولوا خسارة الاكل يقعد ويترمي ف بياكله هو 
قولولي انا غلطانة ولا عندي حق