بنات الناس مش لعبه

السلام عليكم 
انا انسه عندي ٢٨ سنه  اتعرفت على واحد قعد شهور يبعتلي ويزن عليا لحد ما كلمته حوالي سنه واكتر حبيته جدا وكل فترة يقولي انا بظبط اموري وهتقدم خلاص لباباكي ولمت كنا بنخرج سوى كنا بنروح نتفرج على الدهب ويقولي نقي اللي عاوزاه ويصوره عشان نبقى فاكرين يوم ما هننزل نشتري الشبكه الحاجات اللي اختارناها سوى وفي الاخر طلع متجوز وعنده بنتين وبيضحك عليا عشان بيتسلى واخدت صدمة عمري لاني والله حريصه وعمري ما كلمت حد خلصت دراستي واشتغلت في شركة كويسه وعايشة ومش في دماغي الجواز وسايباه للنصيب لحد ما هو ادحلب عليا لانه انسان مريض بالبنات والستات والتسلية بيهم ولما طلبت منه انه يطلقها لو عاوز يتجوزني فعلا مش بيتسلى بيا رفض بعد ما عشمني وبقى يهرب مني بكل الطرق 

بس انا مسكتش وصلت لمراته وبلغتها بكل اللي بينا وبعت لها صور كتير معايا بس كنت مغطية على وشي في الصور بالفوتوشوب وكان ردها عليا انا عارفه انه بيخوني وهو ده طبعه ومش قادرة اغيره فيه ومش هخرب بيتي وانتي اللي سمحتي له انه يضحك عليكي يعني في الاخر جابت الغلط عليا انا روحت عملت ليهم سحر عند واحد ناس رشحتهولي والف حمد وشكر في بينهم مشاكل كبيرة دلوقتي وان شاء الله يطلقوا عن قريب وعلى فكرة انا معملتش كده عشان عاوزاه تاني بالعكس انا كرهته بس كنت عاوزه اديله درس عشان يبطل اللعب ببنات الناس وعشان يبقى درس لكل واحده شايفه جوزها و عارفه انه بيلعب ببنات الناس وسايباه وساكتة طالما بيرجع لها اخر اليوم ومش مهم اي حد تاني ولا بنت حياتها تدمر ويضحك عليها سنة واتنين وترفض عرسان بسببه كل ده مش مهم المهم ان جوزها في حضنها وفي بيتها 
وهو ان شاء الله يشوف رسالتي ديه ويعرف ان لسه حسابه مخلصش معايا لانه موجود في الصفحه وحسبي الله ونعم الوكيل وياريت اي بنت تتعرض لموقف زي ده  ما تقعدش ټعيط وتكتئب وخلاص لا خدي حقك ولو قدرتي تخربي حياته اخربيها زي ما هو خربلك حياتك وكان عنده استعداد يخربها اكتر ويتمادى اكتر واكتر 
هل انا غلطانه انا باخد حقي؟ ياريت الرد