محتار في الحل
مساء الخير عليكم جميعا انا عندي مشكله محيراني ومش عارف اخد فيها قرار انا شاب عمري ٣٠ سنه شغال مهندس أجهزة طبيه في قطر وليا صديق في العمل من منطقه اسمها فاقوس عن طريقه اتعرفت علي بنت من نفس البلد وحصل توافق بينا واتفقت اني انزل عشان الخطوبه وكتب الكتاب والفرح كله خلال شهرين وحاليا انا في مصر ومن يومين بالضبط نزلنا نجيب الشبكه وكان الاتفاق علي ٦٠ جرام دهب ولكن في المحل البنت في حاجات عجبتها وعشان مكسرش بخاطرها جبت ١٠٦ جرام بالضبط وقلت معلش خليها تفرح امبارح كنا عاملين قاعده عشان الحاجات والقايمه وكده فوالدها قلي ان المفروض العريس هو اللي يجيب كل حاجه وده شرع ربنا وانا وافقت
بشرط انه مفيش قايمه والدها رفض تماما وقلي ده حق البنت وانت واخد دكتورة( طبعا هي نفس عمري ) وانه فيما معناه لو مش موافق خلاص نفضها ، تاني حاجه طلب ان اخد شقه تمليك عندهم في فاقوس مع ان شقتي موجوده في مدينه نصر حاجه فخمه ومش مستعد اخد شقه حاليا في اي مكان تاني ، تالت حاجه طلب ان الفرح يكون عندهم في قاعه اعتقد اسمها هيفن وانا كان نفسي الفرح يكون عندنا في مدينه نصر او نايل كروز ، اخر حاجه المؤخر عايزين يكتبو ٥٠ الف ريال قطري وانا طلبت انه يكون ١٠٠ الف جنيه مصري ، انا صراحه حاسس اني رافض كل طلباتهم وفي نفس الوقت عليا ضغط رهيب من البنت ومش عارف اخد قرار هل انا صح ولا مثلا ممكن ارفض حاجات واوافق علي حاجات ولا الغي الفكره وكل شيء نصيب انا عمال اصلي الاستخاره والمفروض ان ارد عليهم علي الجمعه ياريت لو حد يعتبرني اخوه ويقولي اعمل ايه للعلم والدي ووالدتي متوفين عشان كده لجأت لأخواتي هنا
