جوزي محتاج علاج

واحد بتقول
أنا دكتورة صيدلانية عندي 28 سنة واتقدملي مهندس شغال في الإمارات عنده 35 سنة عند طريق حد قريبي شغال معاه. اتعرفنا على بعض في البداية هوه شخص محترم جدا بيصلي حاضر في الجامع وملتزم وطيب جدا اتخطبنا لمدة سنة وخلال الفترة دي كنت ملاحظة انه هادي جدا وفي أغلب الوقت كنت بكلمه وفي نبرة حزن في صوته. كنت حاسه ان في حاجة مزعلاه بس محاولتش اساله عشان كان كويس جدا معاية ومع أهلي وكنت مبسوطة معاه لغاية لما اتجوزنا قعد معاية شهر وبعدها الشركة كلمته واتنقل فرع السعودية واشتغل في المدينة المنورة واخدني معاه. بعدها بفترة كنت بنضف الشقة لقيت شنطة ايد تحت السرير فيها أشعة وتحاليل وروشتات عرفت ان كان عنده جلطة في الشريان الرئوي وفي رجله الشمال وان الجلطة دي وراثية. وانه بياخد أدوية سيولة وبيلبس شراب للجلطات وانه ممنوع من أكل معين. قعدت أعيط زي الهبلة وقررت بعدها اراقبه ليه خبى عليه. في مرة كنت في المطبخ دخل استأذن مني قلي ممكن اطلب طلب عايز نسكافيه اتفاجات انه مش بيديني أمر حسيت انه شخصية ضعيفة. ومرة تانيه كان بيغير لمبة واتكسرت قلي انا اسف اني كسرتها. مرة تالته كان وقع حاجة على الأرض ومسحها واعتذر. مرة واحنا قاعدين نتفرج على فيلم مرة واحدة الاقيه حاطط راسه على رجلي ونايم. حسيت اني متجوزة طفل مش راجل لغاية لما واجهته قلتله انته اتجوزتني ليه؟؟؟

قلي ان هوه كان شغال من صغره في ورشة وأهله كان قاسيين عليه وكان بيضىرب بالكورباج حتى جسمه ناشف والضړب لسه معلم على كتفه وضهره من تحت. وانه طول عمره شقيان محسش بالأمان وطفولته كانت صعبة جدا. وانه كان مرتبط وحب بنت بس أهلها رفضوه لانه كان في بداية حياته لسه ومن الزعل تعب وجاتله جلطة وقعد بعدها 9 سنين رافض الارتباط.
هل جوزي شخص سوي في فرصة يتعالج نفسيا؟؟ أنا بحبه متعلقة بيه بس عايزاه يتغير في شخصيته.
تنصحوني بايه؟